Biyernes, Agosto 31, 2012

Sa ika-10 anibersaryo ng MMVA - Agosto 30, 2012

SA IKA-10 ANIBERSARYO NG MMVA
ni Gregorio V. Bituin Jr.
10 pantig bawat taludtod

nakakabili ng bawat tingi
sa manininda ang kanyang suki
laking tipid sa bawat kalupi
busog na rin kahit na kaunti

sistema'y laging pinagkakasya
kung magkano lang ang nasa bulsa
anong mabibili nitong barya
sa tingian, nakakaraos na

bili kayo, meron akong yosi
dito na rin kayo makisindi
tubig, palamig, meron pang kendi
kung anong gusto, kayo'y bumili

ganyan ang buhay ng manininda
munting puhunan lang, nagbebenta
pamatid gutom ang konting kita
tumutubo kahit barya-barya

sa MMVA, mabuhay kayo
pagpupugay itong pagbati ko
sa pagbaka'y magpatuloy tayo
hanggang ang tagumpay ay matamo

30 Agosto 2012

Miyerkules, Agosto 29, 2012

Mga Indibidwal na Mensahe sa MMVA, Blg. 16-20


16. Mula kay Emma Garcia ng Pasig

"Matatag na nagkakaisa at naninindigan upang makamit ang karapatan na makapwesto at makapagserbisyo sa masa sa pamamagitan ng mas murang bilihing abot-kaya ng lahat.

Patuloy na magpalawak at mag-organisa. Mabuhay ang ika-10 taong anibersaryo ng Metro Manila Vendors Alliance."

17. Mula kay Tita Portia ng PLM-Taguig chapter

"Sila ang mga taong gustong maghanapbuhay para sa kanilang pangunahing pangangailangan, katulad ng pagpapaaral sa mga anak, para makakain ng tatlong beses sa maghapon. Mas mura sa kanila ang kanilang mga paninda dahil wala silang binabayaran na pwesto kaya dapat tangkilikin ang kanilang mga paninda.

Sa MMVA, mabuhay ang ika-10 anibersaryo. Nawa'y patuloy ang inyong pakikibaka para sa karapatan nyo."

18. Mula kay Glenn D. Mendina ng GPNAI, Catmon, Malabon

"Ako ay vendor sa mata ng publiko, pasaway o pasikip sa daanan ng tao. Pero sa isip ko, makatulong sa kapwa sa mura at abot kaya sa bulsa ng nakararami.

Ako bilang hindi vendor, ang masasabi, panatilihing malinis ang mga pagkain o anung bagay-bagay na ikasisira ng kapwa natin."

19. Mula kay Dex ng Piglas-Kabataan (PK), Malabon

"Ako bilang isang kabataan na bumibili ng mga tinitinda ng vendor. Lubos na nakakatipid bukod sa mura na ang tinitinda nila. Nakatawad pa bukod sa mura na, tipid pa. Sila ang mga vendors, ang hanapbuhay ay pagtitinda sa kalsada, dugo at pawis ang puhunan ng manggagawang vendor, bukod pa sa pangmasa ng kanilang paninda ay ibinebenta pa ng mura.

Bilang ambag sa mga nagtitinda ay ipagpatuloy ang pagtitinda ng mga vendor sa mga murang paninda at tipid sa masa."

20. Mula kay Dennis ng Parola

"Mabuhay ang MMVA! Tuloy ang laban!"

Biyernes, Agosto 24, 2012

Mga Indibidwal na Mensahe sa MMVA, Blg. 11-15


Mga Indibidwal na Mensahe sa MMVA, Blg. 11-15 

11. Mula kay Teody Navea ng Bukluran ng Manggagawang Pilipino (BMP)

"Sa mga bansang tulad ng Pilipinas na isang mahirap na bansa, ang mga manininda ay may mahalagang lokasyon sa ekonomiya ng lipunan. Ang kawalan ng gobyerno ng kakayahang magkaloob ng regular na hanapbuhay kung kaya't dumarami sila na mga mala-manggagawang pinagkaitan ng oportunidad sa lipunan. Ang panininda ay isang marangal na hanapbuhay na marapat bigyan ng karampatang proteksyon ng ating gobyerno. Hindi sila dapat ituring na mga peste sa mga lugar na pinagtitindahan. Ang trato sa kanila ng mga iba't ibang ahensya ng gobyerno at lokal na pamahalaan ay dapat iwasto. Ilagay sa tama ang pagtrato sa kanil. Kumprehensibong paglutas sa mga problemang kanilang nararanasan sa pagtitinda. Ang paglalaan ng lugar ng kanilang paninda, pagbibigay ng lehitimong karapatan upang matutukan ng gobyerno ang tamang pagsasaayos at pagtitiyak ng lugar sa kanilang mga paninda.

Ang MMVA ay manguna upang tuluyang mabigyang kalutasan ang mga problema ng manininda at maging boses nila para maipagtanggol ang kanilang mga karapatan at kagalingan.

Isang dekada na ang MMVA at panahon na upang bigyang pansin ang isang saray ng uring manggagawa na may malinaw na papel sa pagpapaunlad ng ekonomya ng bansa."

12. Mula kay Lino ng KPML / ZOTO, taga-Dagat-Dagatan, Caloocan

"Ang pagiging vendor ay isang masipag na tao, nag-aangkat ng paninda at saka ibinibenta. Kaya halos wala nang panahon sa mga ibang mga mapaglibangan, isang hanapbuhay na mala-manggagawa na nagsisikap mabuhay para sa pamilya.

Masasabi ko sa MMVA ay ipagpatuloy ang pag-oorganisa at paglaban para sa kanilang karapatan. Naghahanapbuhay ang isang vendor na minsan ay hinaharas, tinataboy, hinuhuli, at dinidemolis, na sila'y naghahanapbuhay ng marangal para sa kanilang pamilya. 

Isang mainit at mapulang pagbati sa ika-10 anibersaryo ng MMVA!"

13. Mula kay Josie Orioke ng Sanlakas, taga-Payatas, Quezon City

"Para sa akin, ang isang vendor ay napakahirap na hanapbuhay sa lahat ng mga sektor. Nandiyan lahat ang dapat danasan bilang manggagawa dahil nahaharas sila sa mga pag-aabuso sa ating batas at sa mga mayaman nga mamimili. Dumanas din sila sa pag-alipusta at mura. Yon po ang aking masasabi bilang isang vendor at suporta sa kanila.

14. Mula kay Joy Canon ng KPML-NCRR, mula sa Navotas

"Mabuti at meron ng organisasyon ang mga vendor. Meron na magtatanggol sa kanilang mga karapatan. Kasi ang vendor kahit naghahanap ng marangal, pag gustong hulihin ng mga pulis para pagkakitaan ay kanilang huhulihin. Ipagpatuloy lang ninyo iyang organisasyon ninyo. Kaisa ninyo ako sa inyong mga adhikain at adbokasya."

15. Mula kay Fe Dela Cruz ng PLM-Bulacan

"Ang mga kapatid na vendors ay mga taong nagsisikap mabuhay sa malinis na paraan. Sila itong nakikipagpatintero sa daan o nakikipwesto sa harap ng malalaking malls at palengke at sa MM ay nakikipaghabulan sa MMDA. Malinis na hanapbuhay ngunit kapos para makapagbigay ng disenteng buhay sa bawat pamilya. Dahil dito, napakahalaga ng pagkakaroon ng isang organisasyong tulad ng MMVA na siyang nagbubuklod sa interes ng mga vendors at nagtitiyak na patuloy na isusulong ang pagrespeto sa karapatan ng mga kapatid na vendors at ipaglalaban ang pag-angat ng kabuhayan ng bawat vendors at pamilya nito.

Mabuhay ang MMVA! Ipagpatuloy ang 10 taon ng pagkakatayo ng MMVA. Ipagpatuloy ang laban hanggang sa makamit ang tagumpay!"

Huwebes, Agosto 23, 2012

Mga Indibidwal na Mensahe sa MMVA, Blg. 6-10


6. Mula kay Kagawad Ding Manuel ng Brgy. 52, Caloocan City

"Pagpupugay sa ika-10 anibersaryo ng MMVA! Saludo ako sa mga manininda na kasapi ng organisasyon at lahat ng tindera't tindero. Hanga ako sa sipag at tiyaga para sa kaunting tubo para maitaguyod ang kabuhayan ng pamilya at ng bayan. Mabuhay kayo! Kayong ang tagapagtaguyod ng ekonomya ng maliliit na negosyante na hindi nagsasamantala, di tulad ng mga kapitalistang ganid sa tubo.

7. Mula kay Cecilia K. Asis, auditor ng KPML-NCRR chapter

"Bilang isang karaniwang mamimili, malaki ang tulong ng mga vendors sa lipunan, lalo na sa maralita. Pwede ka ba bumili ng tingi o tumawad sa paninda sa SM o sa Robinsons? Natural hindi. Sa pamamagitan ng mga vendors, ang kakarampot mong pera ay mapagkakasya mo kung halimbawa magluluto ka ng gulay, pwede mo makumpleto ng paisa-isa. May tawad na, may dagdag pa. Sa mga ambulant vendors naman, laking ginhawa ng mga maybahay dahil sa pag-iikot nila sa komunidad, di na kailangang iwanan ang gawaing bahay para mamalengke.

Karapatan nila ang maghanapbuhay. Marangal na gawain iyon lalo na kung nagpipilit ka na maitawid sa gutom ang pamilya. Sa kanilang anibersaryo, "Mabuhay kayo!"

8. Mula kay Sandy Bengala ng Sanlakas

"Bilang isang ordinaryong mamamayan, ang MMVA ay malaki ang naitutulong sa mga maralitang manininda upang magkaroon sila ng permanenteng kabuhayan, upang masuportahan nila ang pang-araw-araw na gastusin, at masuportahan ang edukasyon ng kanilang mga anak."

9. Mula kay John Pajares ng KPML / ZOTO

"Sa aking pananaw bilang isang pangkaraniwang mamimili sa mga vendors ay isa silang bahagi ng uring manggagawa. Dahil sila ay nagtatrabaho upang ipangtustos sa pag-aaral ng kanilang mga anak. Ngunit sila ay patuloy na nilalapastangan ng ating pamahalaan at pilit na tinataboy sa mga bangketang kanilang pinagtitindahan. Kaya para sa akin ay suportahan natin ang ating mga kapwa maralitang vendor sa pakikibaka at pagsulong ng kanilang magandang layunin sa kapwa nilang mga vendor."

10. Mula kay Mauro Taberna ng KPML-NCRR

"Ang vendor ay isang maliit na manininda na makikita natin sa mga lansangan at sidewalk. Sila ay tumutugon sa mga pangangailangan ng mamamayan. Ito ay makikita natin kahit saan. Sa loob ng bus, sa mga kalsada at pasilyo. Sila ang mga inaapi ng ating mga gobyerno dahil sa pakalat-kalat sila sa daan. Ang masasabi ko sa MMVA ay ituloy ang laban para sa pagkamit ng ating tagumpay.

Para sa MMVA, mabuhay ang ating organisasyon at tuloy-tuloy na pagmulat sa mga kasama para matagumpay ang ating pagsulong sa mga karapatan at hustisya."

Mga Indibidwal na Mensahe sa MMVA, Blg. 1-5


1. Mula kay Ms. Pohlie C. Hernandez ng Solidarity of Unions in the Philippines for Empowerment and Reforms (SUPER Federation)

"Ang mga vendor sa aking pananaw ay mga kasamang manggagawa. Sila ang tinatawag na nasa Underground Economy. Kung minsan, ang mga vendor ay ginagawang gatasan ng mga korap na pulis. Hinihingan ng lagay at biktima ng human rights violation. Ang mga vendor ay walang siguradong kita. Bakit? Kasi aangkat sila ng mga paninda sa mataas na halaga tapos babaratin naman ng mga mamimili. 

Dapat lang na palakasin ng mga vendor ang kanilang organisasyon upang maipaglaban ang mga lehitimong karapatan. Ipagtanggol ang hanapbuhay at hindi maging biktima ng kotong. Mabuhay ang MMVA!"

2. Mula kay Marissa A. Legalig ng Navotas chapter, BOD - KPML/ZOTO

"Dapat na ipaglaban ng mga vendor ang kanilang karapatan bilang tao, at isa rin silang nakikibaka o nakikipaglaban para sa kanilang hanapbuhay upang itaguyod ang kanilang pamilya. Hindi sila mga busabos na basta na lang paaalisin sa kanilang mga pwesto na kung saan sila nagtitinda. Kaisa rin natin silang nakikibaka para sa karapatan ng mamamayan, maralita, isa ring uring manggagawa."

3. Mula kay Erlinda Sapiandante ng Sanlakas, taga-Baesa, QC

"Dama ko ang hirap ng isang vendor. Ako man ay isa sa kanila. Madaling araw ka gigising, mamalengke, mag-apura ka palagi, hinahabol mo oras para kumita at makabenta, pambayad sa mga utang, gaya ng upa sa pwesto, hulog sa puhunan, at ang iba naman sa kaunting puhunan, lalagay sa bangketa, dadamputin ng pulis / MMDA. Kawawa talaga. At alam natin ang vendors ang siyang may malaking ambag sa ating bansa, sa pag-usad, wag lang silang magnakaw, at makagawa ng masama." 

4. Mula kay Jilbert Rose ng Teatro Proletaryo, taga-Navotas

"Ang isang vendor sa bangketa ay isang marangal na trabaho para sa akin. Ito ay malinis, makatao at walang nilalabag na batas. Naghahanap ka ng pangkain sa pamilya, pero bakit sila inaalis sa bangketa at hindi lang basta inaalis. Kinukuha pa ng mga MMDA ang kanilang paninda at winawasak ang mga kariton o patungan ng paninda nila. Ito ay hindi makatao. Ito ay paglabag sa karapatang pantao. Pinaghirapan nila ang puhunan ng paninda nila. Masama bang maghanapbuhay ang mga vendor sa lansangan? Gusto ata nila e magnakaw na lang ang mga tao, kagaya nila sa gobyerno!"

5. Mula kay Eric P. Ocap ng Piglas-Kabataan (PK), taga-Malabon

"Para sa akin, ang pagiging isang vendor ay isang "uring manggagawa" na gumagawa at lumilikha ng tubo para sa kita ng mga kapitalista. Bilang isang mamimili, ang masasabi ko para sa mga vendor... naiipit sila kapag may nagaganap na pagbabago sa mga presyo ng bilihin dahil sila ay mga negosyanteng maralita na walang kakayahan para tustusan ang mga kakulangan nila bilang vendor. Huwag po kayo magsasawa na lumaban at ipaglaban ang inyong mga karapatan hangga't hindi ninyo nakakamit ang mga benepisyo at iba pa, na dapat ninyong tinatamasa.

Sa inyong ika-10 anibersaryo, nais ko po kayong batiin sa inyong matagumpay na laban sa nagdaang isang dekada. Nawa sana sa mga darating pang panahon ay magpatuloy pa ang mga tagumpay na inyong nakakamtan. At mula po sa Piglas-Kabataan (PK), kami po ay nagpapahayag ng aming suporta sa kung anuman ang inyong mga ipinaglalaban. Muli, maligayang pagbati sa inyong ika-10 anibersaryo."

Lunes, Agosto 20, 2012

Kahilingan ng Vendor - tula ni G. Ramon B. Miranda


Kahilingan ng Vendor
ni Ramon B. Miranda

Trabaho namin ay simple at marangal, 
Laging nasa kalye’t  pag-unlad mabagal.
Hindi nagsasawa pag benta’y matumal,
Upang mabuhay lang aming minamahal.

Ngunit ano itong nangyayari sa ‘min?
Buhay naming vendor laging patawirin.
Maliit ang kita’t maraming pasanin,
Kinukurakot pa aming kakainin.

Hanapbuhay namin  ay “eyesore” sa iba.
Kaya’t MMDA kami’y ginigiba.
Aming kabuhayan laging sinusuba,
Ng mga buwitreng  tila’y naglipana.

Ang ating gobyerno masyadong mahigpit,
Lalo na sa aming mga malilit.
Pag hindi tumigil sa panggigipit
Dugo’t pawis namin sa inyo’y sasapit.

* Si Ginoong Miranda ay isang guro sa Arellano High School sa Maynila, at aktibong opisyal ng Teachers Dignity Coalition (TDC)

Ang Vendor - tula ni G. Ramon B. Miranda


Ang Vendor
ni Ramon B. Miranda

Ang vendor sa kasaldahan
Naglilingkod sa mamamayan
Laman ng lansangan!

Laging lumalaban,
Sa bwitre at tulisang bayan.
Ang vendor ay maaasahan.

Kahit hinahabol,
Ang pagtiinda’y laging protektado.
Laging lumalaban!

Nagtungo sa MMDA.
Karainga’y kanilang ipinaalam
Ang vendor ay maaasahan.

Nagsulputan ang kapulisan
Hinanap ang vendor na lumalaban.
Laging nasa lansangan!

Makibaka! Huwag matakot! Ang sigawan.
Vendor ay tinakot, ang karapata’y ipinagpilitan.
Ang vendor ay maaasahan.
Laging lumalaban.

* Si Ginoong Miranda ay isang guro sa Arellano High School sa Maynila, at aktibong opisyal ng Teachers Dignity Coalition (TDC)

Word Cinquan Poem - tula ni G. Ramon B. Miranda


Word Cinquan Poem
ni Ramon B. Miranda

VENDOR
TAONG MASIPAG
NAGSISILBI SA MAMAMAYAN
KINAGIGILIWAN NG MGA MAMIMILI
NAGTITINDA

MMDA
TAONG GOBYERNO
NAGDEDEMOLISH NG TAHANAN
KINAIINISAN NG VENDOR
MARAHAS

SUKI
TAONG NAMIMILI
MAHILIG SIYANG TUMAWAD
KAIBIGAN NG MGA VENDOR
PARUKYANO

* Si Ginoong Miranda ay isang guro sa Arellano High School sa Maynila, at aktibong opisyal ng Teachers Dignity Coalition (TDC)